Tveir létust í sprengjuárás á veitingastað í Pakistan

Tveir létust og níu slösuðust þegar sprengja sprakk við veitingastað í Islamabad höfuðborg Pakistan í dag. Samkvæmt heimildum öryggissveita sprakk sprengjan við ítalskan veitingastað í miðborginni.

Þetta er fyrsta sprengjuárásin sem beint er gegn útlendingum í Islamabad síðan árið 2002.

Tveir diplómatar, einn bandarískur og annar breskur, voru á meðal slasaðra samkvæmt upplýsingum ríkisstjórna þeirra. Þeir sem slösuðust voru einnig frá Japan, Kanada og Tyrklandi. Þá eru fimm bandarískir ríkisborgara meðal slasaðra.

Samkvæmt vitnum sem BBC talaði við sprakk sprengjan að kvöldi til í garði bak við veitingastaðinn. Gígur myndaðist í jörðinni, gluggar brotnuðu og hluti útveggjar veitingastaðarins hrundi.