Ræningi Shannon tengdur fjölskyldunni

Maðurinn sem rændi hinni níu ára gömlu Shannon Matthews og hélt henni fanginni á heimili sínu í 24 daga er tengdur fjölskyldunni. Vinir og ættingjar fjölskyldunnar söfnuðust saman fyrir utan heimili hennar í gær og slógu upp veislu.

Maðurinn sem rændi Shannon heitir Mick Donovan og er hann skyldur stjúpföður hennar. Nágrannar lýsa honum sem viðskotaillum einfara, en hann mun hafa einangrað sig frá samfélaginu eftir að eiginkona hans fór frá honum með tvær dætur þeirra. Maðurinn býr í tæplega tveggja kílómetra fjarlægð frá heimili Matthews fjölskyldunnar, en fjölskyldan hafði lítið heyrt af honum síðustu árin.

Lögreglan fann Shannon er hún réðist inn á heimili Donovan í gærmorgun. Hafði hún falið sig undir legubekk og benti hún sjálf lögreglunni á ræningja sinn. Ekkert amaði að henni og virtist hún sallaróleg yfir öllu saman. Og föður hennar var að vonum létt.

Vinir og ættingjar Shannon litlu voru að vonum himinlifandi að hafa endurheimt stúlkuna og söfnuðust þeir saman fyrir utan heimili hennar í gærkvöldi og slógu upp veislu.