Leynd yfir heimsókn utanríkisráðherra til Afghanistan

Utanríkisráðherra heldur ásamt fylgdarliði sínu til Afganistan á morgun. Mikil leynd hvílir yfir ferðum ráðherra á meðan ferðinni stendur og mun fimm manna lögreglulið úr sérsveit ríkislögreglustjóra sjá um að tryggja öryggi sendinefndarinnar.

Hátt í sjö ár eru liðin síðan Bandaríkjamenn gerðu innrás í Afganistan og steyptu stjórn Talibana af kolli. Þótt búið sé að koma á nýrri ríkisstjórn og ný stjórnarskrá verið samþykkt, er ástandið í landinu enn mjög eldfimt. Efnahagurinn er í rúst, ópíumframleiðsla blómstrar og alþjóðaherliðið í landinu berst enn á banaspjótum við uppreisnarmenn úr röðum Talibana. Nú síðast í morgun var gerð sjálfsvígsárás á bílalest NATO og létu tveir lífið.

Íslendingar eru meðal þeirra 40 þjóða sem taka þátt í uppbyggingarstarfi í Afganistan. Þar eru nú staddir 14 íslenskir friðargæsluliðar og bætast þrír til viðbótar á næstu vikum.

Ingibjörg Sólrún Gísladóttir, utanríkisráðherra, segir Afganistan eitt mikilvægasta málefni innan þeirra alþjóðasamtaka sem Ísland er aðili að. Þess vegna skipti miklu máli að íslensk stjórnvöld kynnist ástandinu af eigin raun.

Af öryggisástæðum má ekki greina frá hverja Ingibjörg ræðir við í ferðinni og ekki fást upplýsingar um hvernig ferðum hennar er háttað. Með í för er fimm manna lögreglulið úr sérsveit ríkislögreglustjóra sem sem ætlað er að tryggja öryggi sendinefndarinnar. Er þetta í fyrsta sinn sem íslenskt lögreglulið fylgir ráðherra á erlendri grundu. Heimsókn ráðherra stendur fram á skírdag.

Fréttamenn Kompáss eru staddir í Afganistan og munu þeir flytja okkur fréttir þaðan á næstu dögum.