Þýsk lögregla skaut bandarískan hermann

Lögregla í Berlín skaut bandarískan hermann til bana í nótt eftir eltingaleik þar sem meðal annars var beitt þyrlu með nætursjónauka. Hermaðurinn, sem vopnaður var M4-herriffli, hafði kærustu sína í haldi á heimili hennar, batt hana þar og hafði uppi ógnandi tilburði. Henni auðnaðist að sleppa úr haldi hans og gera lögreglu viðvart.

Gerð var leit að manninum og fannst hann í nágrannabænum Königsberg þar sem sló í brýnu með honum og lögreglu. Lyktaði átökunum með því að lögregla veitti hermanninum banvænt skotsár og lést hann á Leopoldina-sjúkrahúsinu í Schweinfurt í kjölfarið.

Bandarísk og þýsk herlögregluyfirvöld rannsaka nú atvikið í sameiningu og hefur herdeild hins látna lýst yfir fullum vilja til samvinnu við rannsóknina. CNN greindi frá þessu.