Íslenskir nemar fá ókeypis smokka

Hrafnhildur Ósk Sigurðardóttir er þessa dagana að gefa öllum nemendum í 9. og 10. bekk grunnskóla og í framhaldsskólum smokka. Hver og einn nemandi 14 ára eða eldri fær því einn ókeypis smokk.

„Þetta byrjaði þannig að ég þurfti að finna mér nýja vinnu í ágúst og datt í hug smokkainnflutningur og þá forvarnarstarf í leiðinni," segir Hrafnhildur. Hún segir að nauðsynlegt hafi verið að endurvekja umræðuna um nauðsyn smokksins á nýjan leik. Hann væri til dæmis eina vörnin gegn kynsjúkdómum.

Hrafnhildur segir að dreifingin gangi vel. Miðstöð heilsuverndar barna sjái um að dreifa smokkunum í grunnskóla og hún hafi sent smokka í pósti til allra framhaldsskóla úti á landi. „Ég hef svo verið að keyra þetta út í framhaldsskóla hérna á höfuðborgarsvæðinu undanfarna daga og á tvo skóla eftir," segir Hrafnhildur.

Hrafnhildur segir að móttökurnar hafi verið mjög góðar. „Þetta er ágætis verkfæri fyrir foreldrra til að byrja að ræða við börnin sín um þessi mál. Oft vita þau ekki hvernig þau eiga að byrja að tala um þessi mál en þarna er komin ákveðin ástæða," segir Hrafnhildur.

Smokkaverkefnið er unnið í samstarfi Icetransport, Doktor.is, 10-11, Fíton auglýsingastofu, Think prentsmiðju, Fm 957, og Smokkur.is.