Öllum barnaskólum lokað í Hong Kong vegna flensu

Öllum leik- og barnaskólum í Hong Kong hefur verið lokað eftir að dularfull flensa dró fjögur börn til bana. Um tvö hundruð eru sýktir.

Í síðustu viku veiktust tvær stúlkur, tveggja og þriggja ára. Nokkrum dögum síðar létust þær. Um síðustu helgi veiktist sjö ára strákur. Hann lést á þriðjudaginn. Læknar segja að svo virðist sem heilabólga hafi valdið dauða hans. Öll voru börnin með flensueinkenni.

Mikill ótti hefur gripið um sig meða foreldra í Hong Kong og segja yfirvöld að þau hafi ákveðið að loka leik- og grunnskólum fyrir páska fyrr en ella til að róa foreldra. Skólarnir verða lokaðir næsta hálfa mánuðinn.

Óttast margir í Hong Kong að nú sé að blossa upp afbrigði af bráðalungnabólgu - SARS eða HABL - sem greindist í Asíu og víðar veturinn 2002-2003. Þá sýktust rúmlega átta þúsund manns og sjúkdómurinn dró 774 til dauða.

Þeir svartsýnustu óttast að hér sé um að ræða fuglaflensuafbrigði en sú flensa greindist nýlega aftur í fuglum í Hong Kong. Hún berst þó ekki auðveldlega í menn og alls ekki milli þeirra. Vísindamenn óttast þó að fuglaflensan stökkbreytist og berist þannig hæglega milli fólks.

Yfirvöld í Hong Kong hafa áhyggjur af þróuninni og hafa því falið einum helsta vísindamanni þar Yuen Kwok-yung að rannsaka þessa flensu. Hann rannsakaði bráðalungnabólguna á sínum tíma.