Hundruð veikjast eftir eiturefnaleka í Kenía

Hundruð manns í nágrenni hafnarborgarinnar Mombasa í Kenía segjast hafa orðið veikir eftir að gámar láku kemískum efnum í Kipevu nálægt höfninni. Vitni sögðu BBC að gámarnir hefðu verið skildir fyrir mánuði síðan af vörubílsstjóra sem tók eftir lekanum. Ekki er ljóst hvað er í gámunum, en talið að þeir geti innihaldið saltpéturssýru.

Síðan hefur fólk sem býr í nágrenninu kvartað um öndunarerfiðleika, magaverki og verki fyrir brjósti.

Umhverfisstofnun landsins segist hafa flutt tonn af sandi og öðrum efnum til að gera sýruna óvirka.

Vörubílsstjórinn var á leið frá höfninni í Mombasa til námufyrirtækis í vesturhluta Úganda þegar hann varð var við lekann og skildi gámana eftir. Fyrirtækið segir að umboðsmaðurinn í Mombasa sjái um málið.

Kona slasaðist þegar innihald eins gámsins skvettist á hendi hennar, aðrir hafa kvartað yfir öndunarvandamálum og öðrum einkennum.

Svo virðist sem gulur vökvi og eiturgufur hafi lekið úr gámunum.