Hættir í fjáröflunarnefnd Clinton vegna ummæla um Obama

Geraldine Ferraro, fyrrverandi öldungadeildarþingmaður og varaforsetaefni, hefur sagt af sér sem fulltrúi í fjárölfunarnefnd Hillary Clinton, forsetaframbjóðanda demókrata, vegna umdeildra ummæla sem hún lét falla um aðalkeppninaut Clinton um útnefningu demókrata, Barack Obama. Þetta tilkynnti Ferraro í dag.

,,Ég hætti í nefndinni þinni svo ég geti talað fyrir sjálfa mig og þú getir áfram talað fyrir þig um hvað er í húfi í þessari baráttu," segir í bréfi Ferraro til Clinton. Þar segir einnig að stuðningsmenn Obama hafi ráðist á hana til þess að skaða baráttu Clinton. ,,Það mun ég ekki leyfa."

Ummælin sem féllu í grýttan jarðveg voru á þá leið að Obama geng vel í forvali demókrata þar sem hann væri svartur. Ferraro þvertók fyrir að ummælin lýstu kynþáttahatri eins og stuðningsmenn Obama héldu fram. Hins vegar hefur hún haldið því fram að umfjöllun fjölmiðla um Clinton hafi einkennst af karlrembu.

Þetta er ekki í fyrsta sinn í baráttu Clinton og Obama þar sem aðili þeim tengdur víkur vegna ummæla sinna. Í síðustu viku sagði Samantha Powers, ráðgjafi Obama í utanríkismálum, af sér eftir að hún hafði kallað Clinton skrímsli í viðtali við skoskt blað.