Ráðning Sigríðar Önnu ekki pólitískur bitlingur

Ingibjörg Sólrún Gísladóttir utanríkisráðherra segir einu leiðina til að fjölga konum í stétt sendiherra að sækja þær út fyrir utanríkisþjónustuna. Hún segir ráðningu Sigríðar Önnu Þórðardóttur ekki pólitískan bitling.

Ekki er ljóst hvar Sigríður Anna verður staðsett þar sem tilkynna þarf það í samvinnu við viðkomandi ríki. Ingibjörg Sólrún segir tvennt liggja að baki því að Sigríður Anna, fyrrverandi umhverfisráðherra og þingmaður Sjálfstæðisflokksins, var ráðin. Annars vegar að hún sé mjög hæf og hins vegar að stefna sé að fjölga kvensendiherrum.

Ef það eigi að fjölga konum í hópi sendiherra verði varla hjá því komist að leita eitthvað út fyrir utanríkisþjónustuna því eins og staðan sé núna séu aðeins tvær konur í hópi sendifulltrúa sem sé næsta lag fyrir neðan sendiherra.

Utanríkisráðherra segir ráðningu Sigríðar Önnu ekki hluta af neinu samkomulagi stjórnarflokkanna. „Ég geri mér alveg grein fyrir því að alltaf þegar um það er að ræða að fólk sé sótt í pólitíkina getur þessi umræða komið upp. En ég tel að fólk sem hefur starfað í stjórnmálum eða viðskiptalífinu eða mennta- eða menningarlífinu hafi góða reynslu af því að búa til tengsl og koma fram fyrir hönd þjóðarinnar og kynna málstað og tala fyrir málstað og það er þannig fólk sem við þurfum í utanríkisþjónustuna," segir utanríkisráðherra.