Krotað á flugvél El Al

Veggjakrot með skilaboðum í þágu Palestínumanna var skrifað á arabísku inn í farangusgeymslu El Al flugvélar. Veggjakrotið uppgötvaðist þegar verið var að afferma vélina á Malpensa flugvelli í Mílanó. Atvikið hefur vakið áhyggjur meðal Ísrela um flugvallaöryggi á Ítalíu.

Raffaele Veri hjá flugvallalögreglunni á Malpensa flugvelli sagði Reuters að skrifað hefði verið; „Lengi lifi Palestína" með tússlit. Hann sagði að slíkt atvik hefði komið upp einu sinni áður.

Samkvæmt Ísraelskum fjölmiðlum stóð einnig „Dauði Gyðinga"

Ísraelska flugfélagið sem vanalega notar öryggisverði við vélar sínar öllum stundum sagði í yfirlýsingu að farið hefði verið fram á rannsókn á atvikinu. Frekari upplýsingar voru ekki gefnar upp.

Ítalska lögreglan sagði að ólíklegt væri að atvikið hefði átt sér stað á Malpensa þar sem vélin var nýlent þegar veggjakrotið uppgötvaðist.

Heimildarmaður Reuters í Ítölsku lögreglunni sagði að yfirvöld hefðu heyrt af atvikiinu eftir að flugvélin var farin frá Mílanó til Tel Aviv á mánudag.