Fangar í Guantanamo fá að hringja í ættingja sína

Bandaríkjaher hyggst leyfa föngum í Guantanamo-fangabúðunum á Kúbu að hringja reglulega í ættingja sína, í fyrsta sinn frá því að búðirnar voru settar á fót fyrir rúmum sex árum. Frá þessu var greint í gær.

Fangarnir hafa aðeins fengið að hafa samskipti við Rauða krossinn bréfleiðis og ræða við lögfræðinga sína hingað til. Einstaka fangar hafa þó fengið að ræða við fjölskyldur sínar, til að mynda ef andlát hefur orðið í fjölskyldunni.

Herinn hefur að öðru leyti ekki heimilað föngum að hringja í ættingja sína og borið því að það geti ógnað öryggi einhvers staðar í heiminum. Í ljósi gríðarlegrar óánægju fanga og harðrar gagnrýni var hins vegar ákveðið að draga úr hömlunum.

275 fangar eru enn í Guantanamo-búðunum vegna gruns um tengsl við hryðjuverkasamtökin al-Qaida eða talibana í Afganistan.