Bubbi líkir Össuri við Napóleon

„Ég bara skil ekki að fólk skuli láta svona út úr sér. " segir Bubbi Morthens. Hann skrifaði um helgina færslu á Bubbi.is, þar sem hann lýsti frati á þær sögusagnir að Össur Skarphéðinsson iðnaðarráðherra sitji að sumbli yfir bloggskrifum sínum um nætur. „Þetta er bara illgirni.

Bubbi segir Össuri svipa nokkuð til Napóleons Bonaparte sem, líkt og Össur, var ritglaður mjög og þurfti lítinn svefn. „Napóleon átti það til að kalla á ritara í miðri orrustu og skrifa Jósefínu bréf." Hann segir Napóleón hafa skrifað hvað ákafast frá 8 á kvöldin til eins og þrjú á nóttunni. „Svo svaf hann til fimm-sex og fór svo að berja á austurríkismönnum. Það eru bara heljarmenni eins og Napóleon og Össur sem leika sér að þessu."

Hann segir samanburðinn á mikilmennunum tveimur þó ekki enda þarna. Í færslunni segir hann ekki skemma fyrir að Össuri svipi nokkuð til keisarans franska: „Lítill og þéttur, herskár orðhákur sem elskar að skrifa stundum illa um náungan. Þó oftast skemmtilega. Það vill svo til að hann kýs að gera það um nætur. Það þýðir þó ekki að hann sé sauðdrukkinn úti í hrauni. Maður þarf ekki endilega að vera honum sammála í einu og öllu. En skemmtilegur er hann og fáa veit ég um sem elskar sína eigin nærveru og rödd jafn mikið og hann gerir, nema þá kannski undritaðan."