Paris Hilton heimsækir Earl

Samkvæmisljónið Paris Hilton verður í gestahlutverki í þættinum "My name is Earl" sem sýndur er á Stöð 2 á fimmtudagskvöldum. Hilton mun koma fram í drauma-atriði í þættinum sem sýndur verður í byrjun apríl vestanhafs en sá þáttur verður sá fyrsti sem fer í loftið eftir að verkfalli handritshöfunda lauk í Bandaríkjunum.

Paris þykir hafa átt heldur brokkgengan feril í leiklistinni og sem dæmi má nefna að fjórar af þeim kvikmyndum sem hún hefur leikið í eru á topp 100 listanum hjá IMDB yfir verstu myndir sögunnar, geri aðrir betur. Henni hefur gengið örlítið betur á sjónvarpsskjánum og á hún að baki nokkur gestahlutverk í þáttum á borð við "The OC" og "Las Vegas".

Þátturinn sem Paris leikur í er klukkustundar langur og þar missir Earl, sem leikinn er af hjólabrettahetjunni Jason Lee, meðvitund og fer að dreyma heldur skrýtinn draum þar sem Paris kemur við sögu.

„Þegar við skrifuðuð karakterinn "Paris Hilton" þá vorum við ekki viss um hver ætti að leika hana," segir höfundur þáttanna, Greg Garcia. „En eftir mikla leit þá fundum við lítt þekkta leikkonu sem heitir einmitt Paris Hilton. Ég get ekki beðið eftir að sjá hvernig hún vinnur úr hlutverkinu og ég bíð óþreyjufullur eftir því að heimurinn uppgötvi hana," sagði Greg.