Þorsteinn er ekki af baki dottinn

Þorsteinn M. Jónsson, íbúi á Laufásvegi 73 segist hvergi nærri af baki dottinn þrátt fyrir margra ára baráttu fyrir því að byggja bílskúr á lóð sinni. Embætti forseta Íslands hefur ítrekað lagst gegn hugmyndinni og meðal annars haldið því fram að bílskúrinn megi ekki byggja af öryggisástæðum.

Úrskurðarnefnd skipulags og byggingarmála hefur nú vísað frá synjun borgarinnar á umsókn Þorsteins og raunar einnig umsókn Einars Eiríkssonar sem vill byggja sólskála á lóð sinni en Einar býr á Laufásvegi 74. Ástæðan fyrir andstöðu forsetans er sú að gestabústaður embættisins er á Laufásvegi 72, beint á móti húsi Þorsteins og við hliðina á húsi Einars.

„Nú er ég bara að ganga frá umsókn í enn eitt skiptið og svo sér maður til hvað gerist," segir Þorsteinn og vonar að nú gangi málið í gegn. Hann segist ekki skilja andstöðu forsetans við framkvæmdagleði nágranna sinna. Því síður segist hann átta sig á því hvernig bílskúrinn geti ógnað öryggi þeirra tignu gesta sem annað veifið gista í húsinu. „Það er reyndar aldrei neinn í þessu húsi. Ólafur kemur stundum með gesti í hádeginu en annað er það ekki. Stundum hvarflar að manni að þeir séu einfaldlega að leggja lykkju á leið sína bara til að vera með leiðindi," segir Þorsteinn.

Þorsteinn bendir einnig á að ef litið sé til öryggissjónarmiða ætti bílskúrinn bara að hjálpa til í þeim efnum. „Ég er þá ekki með bílana mína úti á götu fyrir framan forsetabústaðinn á meðan." Þorsteinn segir að um venjulegan tvöfaldan bílskúr sé að ræða. „Hann er bara svipaður og sá sem hefur verið byggður hér á Laufásvegi 77. Eini ljósi punkturinn í þessu máli öllu er að nú hefur maður fengið tíma til að útfæra hugmyndina aðeins betur. Þess vegna ætla ég nú að reyna að byggja jarðhýsi undir skúrinn og bæta við anddyri og kvisti," segir Þorsteinn M. Jónsson, vongóður um að skúrinn fari að rísa.