Ræddu aðkomu kvenna að friðar og öryggismálum

Aðkoma kvenna að friðar og öryggismálum var meginefni kvenleiðtogafundar sem Ingibjörg Sólrún Gísladóttir utanríkisráðherra sat í Brussel í dag í boði Benitu Ferrero Waldner, framkvæmdastjóri Evrópusambandsins á sviði utanríkismála. Fundurinn var haldinn í tilefni alþjóðlegs dags kvenna, sem er á laugardag, 8. mars.

Um fimmtíu konur tóku þátt í óformlegum samræðum um hvernig stuðla megi að stöðugleika og friði með þáttöku kvenna. Ályktun Sameinuðu þjóðanna nr.

1325 um konur, frið og öryggi og hvernig megi bæta framkvæmd hennar var sérstaklega rædd. Í þessu sambandi má nefna starf Friðarráðs kvenna um Palestínu og Ísraels, en tveir fulltrúar þess sóttu Ísland heim í febrúar sl og sátu fimm félagskonur í ráðinu fundinn í Brussel.

Í innleggi sínu ræddi Ingibjörg Sólrún nýja framkvæmdaáætlun

utanríkisráðuneytisins varðandi ályktun 1325. Sagði ráðherra það skipta sköpum að konur taki þátt í friðarferlum í auknum mæli. Reynslan sýndi að konur gæti að verndun kvenna og stúlkna á átakasvæðum og taki til greina sjónarmið kvenna í sömu andrá og því væri áætlunin vonandi gott tæki til að virkja kraft kvenna í þágu friðar.

Á fundinum var einnig rætt um mikilvægi öflugs tengslanets kvenna en fundurinn var gott dæmi um slíkt. Meðal þáttakenda voru þjóðarleiðtogar, ráðherrar og framákonur hjá frjálsum félagasamtökum og alþjóðastofnunum,

þeirra á meðal Tarja Halonen, Finnlandsforseti, Júlía Tímoshenkó,

forsætisráðherra Úkraínu, og Condoleezza Rice, utanríksráðherra

Bandaríkjanna.