Laxveiði bönnuð í 40 ám í Noregi í sumar

Laxveiði verður bönnuð í 40 ám í Noregi í sumar, veiðitíminn styttur í öðrum, kvótar settir á veiðimenn og veiddum löxum sleppt í stórum stíl. Þetta er gert til til að reyna að bæta ástand villtra laxastofna í landinu.

Fram kemur í Aftenposten að ekki hafi veiðst nema 190 þúsund laxar í norskum ám og vötnum í fyrra sem er langt undir meðaltali tveggja áratuga. Jafnt og þétt hefur dregið úr veiðunum síðustu árin og hefur Alþjóðahafrannsóknaráðið nú mælst til þess að Norðmenn dragi verulega úr sókn í laxinn til að útrýma ekki stofnunum.

Þegar er ákveðið að banna með öllu veiði í 40 ám. Alvarlega er rætt um að banna netaveiðar í vötnum. Þá er í bígerð að kvótasetja veiðina í mörgum ám, allt niður í einn lax á veiðimann á dag. Annars staðar vilja menn fara hægar í sakirnar og leyfa fleiri fiska gegn því að þeim flestum eða öllum verði sleppt aftur en hingað til hafa norskir veiðimenn verið tregir til að sleppa fenginni bráð.

Það færist hinsvegar í vöxt hér á landi án þess að sérstakar reglur gildi um það og án þess að einhver verndunarsjónarmið ráði í öllum tilvikum, eða eins og einn veiðimaðurinn sagði við frétamann í fyrrasumar: „Ég sleppi þeim ef ef það er langt að bera þá upp í jeppann."