Andlit Iceland á kafi í kóki

Þrátt fyrir að vera komin fjóra mánuði á leið og bumban sé orðin greinileg sýgur söngkonan Kerry Katona kókaín með upprúlluðum 20 dala seðli eins og ekkert sé. Katona, sem er andlit Iceland keðjunnar, fullyrðir við vini sína að ekkert sé að óttast. „Maður getur vanið barnið sitt af kókaíni, það er einungis áfengið sem veldur raunverulegum skaða," er haft eftir henni.

Það var einn af vinum Katona, sem sagði blaðinu News of the World frá líferni hennar í þeirri von að hún gæti snúið við blaðinu og farið að huga að fjölskyldu sinni á ný. „Hversu slæmt er það að ala fallegt barn inn í þennan heim, sem þarf síðan að venja af þeim fíkniefnum sem hefur verið dælt inn í líkama þess. Ég veit ekki hvernig Kerry getur gert barninu sínu þetta. Þetta er viðbjóðslegt," sagði vinurinn.

„Kerry hefur verið á kókaíni alla þessa meðgöngu. Ég veit þetta af því að ég hef séð hana neyta þess. Þetta er sorglegt en hún er í fíkn og í afneitun. Hún eyðir að minnsta kosti 100 pundum á dag í kókaín," er haft eftir vini Katona. Hann segir að vinir hennar reyni að sannfæra hana um að hún sé að skaða sig mikið en hún hlusti bara ekki.

Búist er við að Kerry muni eiga í maí.

Iceland keðjan, sem Katona starfar fyrir, er að stærstum hluta í eigu íslensku eignarhaldsfélaganna Baugs og Fons.