Fjármálaráðherra skálar í nýjum íslenskum bjór

Nýr íslenskur bjór, Skjálfti, verður settur á markað 1. mars, á sjálfan bjórdaginn, en þá eru 19 ár síðan sala bjórs var aftur leyfð á Íslandi, eftir áratuga bann.

Þetta kemur fram í fréttatilkynningu frá framleiðandanum.

Skjálfti verður seldur í tveimur vínbúðum ÁTVR í Reykjavík til að byrja með og einnig verður hann sérpantaður í ÁTVR á Selfossi og í aðrar áfengisverslanir á landsbyggðinni. Framleiðandi Skjálfta er Ölvisholt brugghús sem er í Ölvisholti í Flóa. Skjálfti er 5% að styrkleika.

„Við erum búnir að standa í mikilli þróunarvinnu vegna Skjálfta og útkoman er ekta sunnlenskt gæðaöl, sem byggir á fornum evrópskum hefðum og þeim kröfum sem sælkerar gera til góðs bjórs," segir Bjarni Einarsson, framkvæmdastjóri Ölvisholts brugghúss.

Sérstöðu Skjálfta má rekja til einstakrar blöndu humla, maltaðs byggs og hveitis, sem eykur fyllingu bjórsins og auðkennandi gylltan lit hans. Með sérvöldu geri tryggir bruggmeistari Ölvisholts maltbragð Skjálfta og krafa fyrirtækisins um ferskleika útilokar notkun rotvarnarefna, sykurs og annarra viðbótarefna. Öll aðstaða í Ölvisholti er til fyrirmyndar þar sem gömul útihús hafa fengið nýtt hlutverk; hesthúsið er orðið að kornhlöðu, flatgryfjan að brugghúsi, í gömlu hlöðunni fer átöppun fram og þar er lager fyrirtækisins.

Á miðanum aftan á Skjálftaflöskunum eru stuttar tilvitnanir úr Flóamannasögu og tengja þær bjórinn við svæðið þar sem hann er bruggaður. Á merkimiðanum að framan má einnig sjá norræna galdrastafi og rúnir. Rúnirnar standa fyrir sælkerabjór en galdrastafirnir tveir eru tákn drauma og væntinga.

„Þeir sem hafa prófað Skjálfta gefa honum hæstu einkunn enda um úrvalssælkerabjór að ræða," segir Bjarni Einarsson, framkvæmdastjóri Ölvisholts brugghúss. „Viðtökurnar hafa verið frábærar og við vonum að það verði eins þegar bjórinn er kominn á almennan markað. Við munum framleiða 300 þúsund lítra á ári til að byrja með og þar af fara um 100 þúsund lítrar á markað í Danmörku. Þar í landi verður framleiðslan seld undir öðrum vörumerkjum á vegum Gourmetbryggeriet A/S, sem er með aðsetur í Hróarskeldu."