Jákvæðar fréttir af Britney

Eftir að samkomulag var undirritað þann 22. febrúar á milli Britney Spears og Kevin Federline, varðandi rétt Britney til að umgangast syni sína, þá Preston og Jayden, hefur allt gengið eins og í sögu hjá söngkonunni.

Preston og Jayden fóru í sína þriðju heimsókn á einni viku til mömmu sinnar nú á miðvikudaginn en þessar heimsóknir eru hluti af samkomulagi Britney og Kevins, sem fer með fullt forræði yfir drengjunum.

Á laugardaginn fékk Britney að hitta börnin í fyrsta skipti síðan 3. janúar.

Í tímaritinu People, sem kom út í Bandaríkjunum í dag, er sagt að samverustundir Britney og sonanna séu afar ástúðlegar. Britney er hins vegar undir stöðugu eftirliti á meðan þeim stendur. Um þetta eftirlit sér sálfræðingur hennar, Lee Sadja, en sá hefur ásamt föður hennar séð um mál Britney síðan hún var lögð inn á Cedars-Sinai sjúkrahúsið fyrir skömmu.