Tölvuleikur með Gillzenegger

Egill Einarsson er einn umtalaðasti maður síðustu daga. Eftir að "Gillz" og félagar úr Merzedes Club kepptu í Eurovision hefur maðurinn verið á allra vörum. Nú er kominn vinsæll tölvuleikur á netið. Leikinn geta allir spilað en hann ber heitið, Gillzenegger í ræktinni.

„Ok ég hef verið með sjónvarpsþátt, útvarpsþátt, gefið út bók, verið vinsælasti bloggari landsins, módel, hnefaleikakappi, kraftlyftingamaður, rithöfundur og tónlistarmaður. En mér fannst alltaf vanta eitthvað, vissi aldrei almennilega hvað það var. En ég veit núna nákvæmlega hvað það var. Mig vantaði minn eigin tölvuleik!! Ég held ég hafi aldrei á ævinni verið jafn stoltur og núna," skrifar Gillzenegger á bloggsíðu sína.

Leikurinn gengur út á að klæða Gillzenegger í föt og er hægt að velja úr ýmsu. Meðal annars er hægt að setja á hann húðflúr og klæða hann í pínuskýlu.

„Síðan er þetta líka besti tölvuleikur sem ég hef á ævinni prófað. Þó mér finnist ég vera full rýr á myndinni þá er þetta hrikalega gaman. Það er hægt að klæða mig í föt og úr fötunum. Mér finnst skemmtilegast að klæða mig í hlyrabol og svitaböndin."

Hægt er að spila leikinn með því að smella hér.