Enginn "menntaskólabragur" á leikritinu í MH

Næstkomandi föstudag, þann 29. febrúar mun leikfélag Menntaskólans við Hamrahlíð frumsýna leikritið E1NTAK. Viðfangsefnið er einstaklingurinn andspænis veröldinni og hvort tilvera okkar hafi eitthvert vægi hér á jörðinni?

Hlaupið er í gegnum lífskeið manneskju sem reynir að fóta sig í fallvöltum veruleikanum. Notast er við svokallaða „Devised"- eða samsetta aðferð sem felur í sér að í upphafi ferlisins er hvorki handrit né hlutverk, einungis hugmyndaflug leikara og leikstjóra.

Allt er leyfilegt og reynt er að víkka sjóndeildarhring leikaranna á leiklistinni. Með þessu kynnist hin ungi leikhópur nýrri aðferð við nálgun viðfangsefnisins. Þetta reynir virkilega á hópinn sem heild og snýst um svo miklu meira en að læra línur og taka nótur.

Skólinn afhenti leikfélaginu rými í skólanum sem kallast Undirheimar. Þar sem áður var rykfallin geymsla er nú hrátt og flott leikrými. Þessi svokallaði „black box" er eitt af fáum á landinu og býður upp á marga möguleika. Nálægðin er svo mikil að áhorfandinn upplifir sig sem hluti af verkinu.

Leikstjórar verksins eru Stefán Hallur Stefánsson og Vignir Rafn Valþórsson. Þrátt fyrir ungan leikaldur hafa þeir nú þegar leikið í ýmsum verkum í leikhúsum landsins og auk þess talsvert komið fram í sjónvarpi og bíómyndum. Þeir eru hluti af sjálfstæðum leikhóp sem að nefnist Vér Morðingjar. Þessi leikhópur samanstendur af ungum leikurum sem langar til að prófa nýja hluti og leita í áður ókannaðar áttir; sjá eitthvað nýtt gerast (ver-mordingjar.blog.is).

Í gegnum tíðina hafa ótal margir þjóðþekktir einstaklingar stigið sín fyrstu spor í leikritum leikfélags MH. Þar má nefna Karl Ágúst Úlfsson, Benedikt Erlingsson, Halldóru Geirharðsdóttur, Ilmi Kristjánsdóttur, Björn Thors og fleiri. Óhætt er að segja að einhverjir í núverandi leikhópi eigi eftir að bætast við þennan lista og láta mikið að sér kveða í framtíðinni.

Þetta er sérstök sýning að því leytinu til að vera unnin frá grunni af nemendum og hún byggist einungis á sköpunargleði, metnaði og leikgleði þessa unga og efnilega leikhóps. Það er enginn „menntaskólabragur" á þessu kraftmikla leikriti sem að vert er að hafa auga með.

Sýningar eru á eftirtöldum dögum:

Frumsýning - 29.feb kl.19:00

2.Sýning - 3.mars kl.19:00

3.Sýning - 4.mars kl.19:00

4.Sýning - 5.mars kl.19:00

5.Sýning - 7.mars kl.19:00

6.Sýning - 8.mars kl.17:00

7.Sýning - 10.mars kl.19:00

8.Sýning - 11.mars kl.19:00

9.Sýning - 12.mars kl.19:00

10.Sýning - 14.mars kl.19:00

Miðaverð er 1000 kr. fyrir meðlimi nemendafélags skólans og börn yngri en 12 ára, fyrir aðra kostar 1500 kr.

Miðasölusíminn er 846 4890 og 865 1254. Einnig er hægt að panta miða og fá nánari upplýsingar á leikfelag@nfmh.is.