Vill að Will Smith leiki sig

Barack Obama væntanlegur forsetaframbjóðandi demókrata telur að Will Smith ætti að leika sig ef búin yrði til mynd sem byggði á ævi hans. Þetta kom fram í viðtali Obama við tímaritið Entertainment Tonight. „Ég og Will Smith höfum talað um þetta, af því að hann hefur eyrun mín. Hann er myndarlegri en ég, en við höfum eyrun," sagði Obama. Hann bætti því við að Smith væri viðkunnaleg stjarna.

En samkvæmt skoðanakönnun markaðsrannsóknarfyrirtækisins Zogby, telja flestir að Denzel Washington ætti að leika Obama. Will Smith var svo í öðru sæti og á eftir honum kom Don Cheadle.

Flestir töldu hins vegar að Tommy Lee Jones væri best til þess falinn að leika John McCain, en á eftir honum kom Clint Eastwood. Þegar spurt var um Hillary Clinton kom í ljós að flestir svarenda töldu að Martha Stewart ætti að leika hana, en á eftir Stewart kom Ellen DeGeneres.