Stjörnurnar mættar á rauða dregilinn

Stjörnurnar streyma nú inn á rauða dregilinn við Kodak-höllina í Hollywood. Þrátt fyrir vonskuveður á mælikvarða Kaliforníubúa - rigningu - skarta þær flestar sínu fegursta.

Mikil eftirvænting er eftir Óskarsverðlaunahátíðinni sem hefst eftir rúma klukkustund. Um tíma var óttast að slá þyrfti hátíðina af vegna verkfalls handritshöfunda. Það stóð í rúma hundrað daga, og leystist einungis tæpum tveimur vikum fyrir hátíðina.

Alla jafna tekur það sjö mánuði að skrifa handritið að verðlaunahátíðinni, en nú höfðu handritshöfundundarnir einungis um tíu daga. Mesta óvissan nú ríkir því um það hvort brandarar kynnanna verði fyndnir.