Hvalkjötið enn óselt

Þegar á annað ár er liðið frá því að Hvalur 9 veiddi síðustu langreyðina í atvinnuskyni hefur enn ekki tekist að semja við Japani um fyrirkomulag á sölu á kjötinu þangað. Sjávarútvegsráðherra er heldur þó í vonina um að það takist.

Í október 2006 hófust hvalveiðar í atvinnuskyni við strendur landsins á ný eftir tæplega 20 ára hlé. Sjávarútvegsráðherra heimilaði þá veiðar á 9 langreyðum og 30 hrefnum. Hvalur 9 flaggskip hvalveiðiflotans hélt í sama mánuði aftur til veiða en alls voru þá veiddar sjö langreyðar. Til stóð að kjötið yrði selt til Japans þar sem forsvarsmenn fyrirtækisins Hvals töldu markað fyrir kjötið þar. Nú þegar liðið er á annað ár frá því síðasta langreyðurin var veidd hefur enn ekki tekist að ganga frá sölu á kjötinu þangað. Einar K. Guðfinnsson sjávarútvegsráðherra hefur lýst því yfir að veiðunum verði ekki haldið áfram fyrr en ljóst verði hvort að hægt verði að selja kjötið.

Kristján Loftsson framkvæmdastjóri Hvals sagði í samtali við fréttastofu að Hvalur ætti til um sjötíu tonn af kjöti sem væri tilbúið til útflutnings um leið og leyfi fengist. Íslensk stjórnvöld hafa átt í óformlegum viðræðum um hvernig hægt er að standa að sölunni en hins vegar stendur enn á leyfinu frá japönskum stjórnvöldum fyrir því að flytja kjötið inn þar. Sjávarútvegsráðherra er vongóður um svör berist á næstunni. Hann segir öll tilskilin vottorð liggja fyrir og veit því ekki hvað tefur málið hjá japönskum stjórnvöldu.