Nánir vinir Vilhjálms gætu grætt milljarða á lóðabraski

Magnús Jónatansson, einn nánasti vinur og stuðningsmaður borgarstjórans fyrrverandi Vilhjálms Þ. Vilhjálmssonar, og félagar hans í eignarhaldsfélaginu Lindberg gætu grætt milljarða á lóðabraski í Örfirisey. Til þess að þarf þó fyrst að breyta deiliskipulagi hafnarsvæðisins í íbúðabyggð.

Lindberg, sem er í eigu hæstaréttarlögmannsins Ólafs Garðarssonar, áðurnefnds Magnúsar og Ómars Benediktssonar, stjórnarformanns RÚV ohf auk Byr og Icebank, hóf uppkaup á eignum á Fiskislóð um mitt ár 2006. Skömmu áður hafði meirihluti Sjálfstæðisflokks og Framsóknarflokks undir forystu Vilhjálms Þ. Vilhjálmssonar, tekið við völdum í borginni.

Síðan þá hefur Lindberg keypt á þriðja tug eigna í Örfirisey, flestar í Fiskislóð en einnig tryggt sér forkaupsrétt að tíu eignum á Hólmaslóð og Eyjarslóð. Heimildir Vísis herma að Lindberg hafi greitt á þriðja milljarð fyrir eignirnar en Faxaflóahafnir féllu í öllum tilfellum frá forkaupsrétti sínum.

Um ræða mjög stórt svæði sem hleypur á tugum þúsunda fermetra og má ljóst vera að svæðið verður gífurlega verðmæt þegar og ef nýtt deiliskipulag verður samþykkt með íbúðabyggð. Þá munu Magnús, sem hefur lýst yfir stuðningi sínum við Vilhjálm Þ. opinberlega, og félagar hans í Lindberg væntanlega græða milljarða.

Þetta eru þó ekki einu tengsl Vilhjálms Þ. við lóðirnar í Örfirisey. Svanur Vilhjálmssson, bróðir borgarstjórans fyrrverandi, græddi samkvæmt heimildum Vísis um 50 milljónir eftir að hafa fengið úthlutað lóð á Fiskislóð 37 í nafni eignarhaldsfélagsins Kvikk í byrjun árs 2007. Félagið virðist hafa verið stofnað í þeim eina tilgangi að fá þessa lóð. Nokkrum mánuðum seinna seldi Svanur eignarhaldsfélagið, hvers eina eign var lóðin á Fiskislóð, til Þormóðs Jónssonar sem er nánasti viðskiptafélagi Hannesar Smárasonar, fyrrverandi forstjóra FL Group. Lóðin, sem átti að vera klár síðastliðið haust, hefur enn ekki verið skráð í Fasteignamat ríkisins.