Kveikt í „Batman“-skikkju Eurobandsins

Það verður engin „Batman" skikkja í atriði Eurobandsins í undankeppni Evróvisjón í Smáralind á Laugardag. „Nei, það var kveikt í vængjunum í gær," segir Friðrik Ómar, annar söngvara Eurobandsins. Batman skikkjan var fokdýr, enda gerð úr dýrindis silki sem Friðrik keypti fimmtán metra af í Taílandi í janúar.

„Þetta var þvílíkt klúður. Okkur fannst þetta svo flott á sviði en svo kom þetta illa út í sjónvarpinu, þannig að við hættum við að nota hana," segir Friðrik, sem var staddur í brúnkuklefa þegar Vísir náði tali af honum. Hann var ekki einn um að vera í stífum útlitsundirbúningi, en þegar hann kom út úr klefanum biðu þar Regína Ósk, Birgitta haukdal og Ragnhildur Steinunn.

Friðrik er þaulvanur Evrovisjónþáttöku, en hann hefur tekið þátt í undankeppninni síðastliðin þrjú ár. Hann ætlar sumarbústað uppi í Skorradal í kvöld að hlaða batteríin fyrir stóra kvöldið á morgun. Það er ekki vanþörf á. Um leið og forkeppnin er búin fer Friðrik á Broadway þar sem hann tekur þátt í George Michael sýningu og að henni lokinni tekur við ball með Eurobandinu frá tólf til tvö. Þar á eftir skellir Friðrik sér á NASA þar sem yfir Eurovisionsérfræðingur landsins, Páll Óskar, stendur fyrir árlegu Eurovisionpartýi sínu. „Ég þarf að drekka svolítið af kaffi og herbalife-te fyrir þetta" segir Friðrik og hlær.