Spáir Merzedes Club sigri

„Það liggur alveg fyrir að Barði vinnur þetta," segir Logi Bergmann Eiðsson einn helsti sérfræðingur þjóðarinnar í Eurovisionfræðum. Þar á hann við lag Barða Jóhannssonar sem flutt er af Merzedes Club genginu.

Logi hefur þrisvar sinnum farið út og lýst keppninni beint heim. Hann er alveg handviss um að lagið "Ho, ho, ho we say hey, hey, hey" sé það sem komi okkur sem lengst í þessari keppni.

„Þetta lag er mað langbesta krókinn og er mjög grípandi. Þegar fólk er að kjósa man það bara eftir laglínunni sem er mjög grípandi í þessu lagi," segir Logi sem ætlar svo sannarlega að gefa laginu sitt atkvæði.

Mikill hiti er í kringum úrslitin í Eurovision sem fram fara í Sjónvarpinu á laugardaginn og er meðal annars uppselt á keppnina.

„Ef við spáum aðeins meira í þetta þá hafa menn oft reynt að gera eitthvað sérstakt og við höfum ekki alveg verið að hitta almennilega á það. En í gegnum tíðina höfum við séð lög með grípandi laglínu sem hafa gert góða hluti, t.d þessi gömlu Júgóslavíu lög sem dæmi," segir Logi Bergmann að lokum.