Þorfinnur kynnir Óskarinn

Það verður nýr maður í brúnni í útsendingu Stöðvar 2 frá Óskarsverðlaunahátíðinni næsta sunnudagskvöld. Ívar Guðmundsson, sem hefur kynnt hátíðina frá því elstu menn muna, lætur af því starfi, en við honum tekur Þorfinnur Ómarsson.

Þorfinni lýst vel á hlutverkið, enda mikið Óskarsnörd að eigin sögn. Óskarsverðlaunahátíðin er fleiri klukkuktímar að lengd, en Þorfinnur hefur engar áhyggjur af því að verða uppiskroppa með umræðuefni yfir útsendingunni. „Ég mun nú reyna að tala sem minnst yfir erlenda kynninn, það fer í taugarnar á fólki," segir Þorfinnur, og bætir við að svo séu góðar pásur inn á milli.

Klæðnaður stjarnanna á Rauða dreglinum á það til að vekja meiri athygli en verðlaunin sem þær hljóta og hefur Þorfinnur örlítið meiri áhyggjur af því að lýsa honum. „Þetta er eitthvað sem maður kastar sér út í djúpu laugina með," segir Þorfinnur, og bætir við að hann hafi þó ekki minni áhuga á fallegum konum í fallegum kjólum en bíómyndum.