Tekið tillit til loðnumála við endurskoðun mótvægisaðgerða

Geir H. Haarde forsætisráðherra segir að það þurfi að taka tillit til þess við endurskoðun mótvægisaðgerða ef ekki finnst meiri loðna við landið á þessari vertíð. Þetta kom fram í máli hans í fyrirspurnartíma á Alþingi í morgun.

Steingrímur J. Sigfússon, formaður Vinstri - grænna, spurði ráðherra hvort ríkisstjórnin hefði endurskoðað áform sín varðandi mótvægisaðgerðir eins og boðað hafði verið. Vísaði hann jafnframt til nýjustu tíðinda um að loðnuveiðar yrðu stöðvaðar á hádegi í ljósi þess að Hafrannsóknarstofnun hefði ekki fundið hana í nægilegu magni. Spurði hann jafnframt hvort til stæði að efna til þverpólitísks samstarfs um þessa hluti.

Geir H. Haarde forsætisráðherra sagði að þjóðinni hefðu borist mikil ótíðindi í gær varðandi loðnuna en hann teldi að sjávarútvegs- og landbúnaðarráðherra hefði tekið þá einu ákvörðun sem hægt var að taka á grundvelli ráðlegginga Hafrannsóknarstofnunar. „Öll vonum við loðnuveiðum sé ekki lokið á þessari vertíð," sagði Geir og benti á að það væri ekki útilokað að loðna fyndist í veiðanlegu magni á næstunni. Þá benti hann enn fremur á að loðnan væri dyntóttur fiskur og ekki í fyrsta sinn sem þetta gerðist. Sagði Geir aðalatriðið að vakta miðin og fylgjast með hvort loðnan færi að gefa sig.

Forsætisráðherra sagði hins vegar að ef ekki fyndist meiri loðna á þessari vertíð þýddi það gjörbreyttar aðstæður víða í landinu á þeim stöðum sem hafa reitt sig öðrum fremur á loðnuveiðar. Þá sagði hann hinar almennu mótvægisaðgerðir vegna skerðingar á þorskkvóta vera að koma til framkvæmda en ef þetta þunga högg vegna loðnuveiðibannsins yrði að veruleika þyrfti að taka það inn í myndina við endurskoðun mótvægisaðgerða.