Grand Rokk gestir kaupa listaverk í bunkum

Listamaður Kormákur Bragason hefur mokað út listaverkum á Grand Rokk undanfarið. „Fyrirtækið sem ég vann hjá hætti í janúar og ég hugsaði með mér að ég þyrfti að gera eitthvað. Ég fékk nokkur blöð til að krota á, hamaðist í nokkra daga og valdi svo það besta," segir Kormákur, sem náði að þekja heilan vegg með myndum.

Viðbrögðin létu ekki á sér standa. Verkin, kolaskyssur í smærri kantinum, rokseldust og brátt var veggurinn tómur. Hann var fylltur aftur en tæmdist jafnharðan. Nú þrýsta viðskiptavinir barsins á það að hann fylli annan vegg, og sat Kormákur sveittur um helgina að reyna að svara þeim kröfum.

Aðspurður hvort hann hafi beitt hefðbundnum listasýningabrögðum og marínerað gesti sína með göróttum drykkjum til að örva sölu, kannast Kormákur ekki við það. „Ég held þeir sjái um það sjálfir."

En eru gestir Grandrokk svona múraðir? „Hér eru bæði öreigar og moldríkir menn," segir Kormákur. Myndirnar geta þó tæpast talist dýrar af listaverkum að vera, en þær kosta um 25 þúsund krónur hver.

Kormákur segist þó ekki á grænni grein fjárhagslega eftir söluna. „Þetta bjargar húsaleigunni og því sem þarf að borga í náinni framtíð" segir Kormákur að lokum.