Sprenging á sólbaðsstofu í Kaupmannahöfn

Sprenging varð á sólbaðsstofu í Kaupmannahöfn í morgun og sáust tveir grímuklæddir menn hlaupa frá vettvangi. Frá þessu greina danskir miðlar.

Lögregla segir að hugsanlega hafi verið um sprengju að ræða og var sprengingin svo öflug að öll framhlið sólbaðsstofunnar gjöreyðilagðist. Engan sakaði í sprengingunni.

Mennirnir tveir sem sáust hlaupa af vettvangi skildu eftir tösku í nágrenninu og óttast lögregla að þar geti verið sprengja. Því hefur svæðið verið girt af. Mennirnir eru sagðir af erlendu bergi brotnir og á bilinu 15-20 ára og er þeirra nú leitað.