Íslensk forsjárdeila að baki blóðugum átökum í Danmörku

Að baki hinna blóðugu átaka sem áttu sér stað á milli íslenskra feðga og dansks karlmanns í Langæbæk í Danmörku um helgina býr harðvítug forræðisdeila. Málið hefur ratað á síður helstu dagblaða Danmerkur en þarlendir fjölmiðlar segja að afbrýðissemi hafi búið að baki átökunum. Málið er hins vegar mun flóknara en það.

Feðgarnir íslensku, þeir Svavar Guðnason og Daníel Örn Svavarsson, fóru utan til að sækja sjö ára dóttur Svavars, og systur Daníels, sem býr í Langebæk ásamt íslenskri móður sinni og dönskum sambýlismanni hennar. Móðir stúlkunnar fer ekki með forræði yfir henni og feðgarnir hafa gögn undir höndum sem sanna það. Þeir segja að aðstæður stúlkunnar í Langebæk séu afar slæmar. Mikil áfengisneysla sé á heimilinu og önnur óregla. Stúlkan hefur verið hjá móður sinni í Danmörku síðan að móðurafi hennar fékk leyfi til að fara með hana þangað í stutt leyfi. Ár hefur nú liðið og forráðamenn stúlkunnar á Íslandi fyrir löngu farnir að ókyrrast.

Þegar feðgarnir komu til Langebæk var þeim meinað að hitta stúlkuna. Sambýlismaður móður hennar sá til þess. Fljótlega sló í brýnu þeirra á milli og átök brutust út sem enduðu með því að lögregla handtók feðgana. Sambýlismaðurinn hafði þá hlotið nokkra áverka.

Danskir fjölmiðlar fjölluðu mikið um málið í kjölfarið. Þar var talað um að afbrýðissemi hefði ráðið för og að Íslendingarnir hefðu barið sambýlismanninn með járnröri.

Samkvæmt upplýsingum frá Tom Buhl er stjórnar rannsókn málsins fyrir lögregluna á Suður-Sjálandi var árásin töluvert blásin út í dönskum fjölmiðlum. „Sem dæmi get ég nefnt að fjölmiðlar tala um að feðgarnir hafi notað járnrör en í raun var um örþunnan rafmæli að ræða," segir Buhl sem bætir því við að meiðsli Danans séu minni háttar, í raun aðeins um marbletti að ræða.

Feðgarnir eru nú komnir heim til Íslands en þeir hyggjast ekki leggja árar í bát. Þeir hyggjast höfða mál í Danmörku til þess að tryggja að stúlkan litla komist heim í hendur þeirra sem fara með forræði hennar og hafa ráðið sér lögmann til þess að tryggja að svo verði.

Vísir ræddi við annan feðganna, Daníel Örn Svavarsson í dag. Hann sagði að það hefði aldrei vakið fyrir sér eða föður hans að stofna til vandræða.

Hann segir einnig að systur sinni líði illa þar sem hún sé nú niðurkomin. Það hafi hún sagt honum í síma.

"Við óttuðumst um öryggi og velferð systur minnar. Við vildum koma henni í öruggar hendur," segir Daníel.