Gísli Marteinn í pólitísku blóði sínu fyrir eigin tilverknað

Össur Skarphéðinsson iðnaðarráðherra lýsir því yfir í bloggfærslu í nótt að ferill Gísla Marteins Baldurssonar, borgarfulltrúa Sjálfstæðisflokksins, sé á enda. Hann liggi nú í pólitísku blóði sínu - fyrir eigin tilverknað.

Pólitísk aftaka Össurar á Gísla Marteini er í færslu undir fyrirsögninni Sjálfseyðing ungstirnis. Þar segir Össur að allir hafi vitað að hann hafi verið operatörinn í árásunum á Vilhjálm Þ. Vilhjálmsson, beinlínis til að klekkja á manni sem sat í stöðu sem hann girntist. Hinn smurði kandídat heimastjórnarvængsins, eins og iðnaðarráðherra lýsir Gísla.

Össur segir svo að efasemdir um Gísla hafi fljótlega vaknað, hann hafi verið linur í þáttum og fengið undarlega djúpan áhuga á að drepa máva á tjörninni. Iðnaðarráðherra spyr svo:

„Hvað lá eftir Gísla Martein þegar kom að atburðarrásinni kringum REI? Ekkert, nema hræin af mávunum sem hann lét embættismenn skjóta og stillti sér svo upp hjá einsog Rambó sjálfur."

Þegar stjarna Gísla hafi tekið að hníga hafi:

„Æstur gjallandi (komið) í stað glaðrar raddar sjónvarpsbarnsins, tindrandi augu spámannsins sem var eins og að koma úr langri föstu utan af eyðimörkinni - þetta varð að myndinni af hinum unga stjórnmálamanni, sem minnir í dag óþægilega á framkomu nýja borgarstjórans."

Þá skrifar Össur að Capacent könnunin, sem birtist í Íslandi í dag í gærkvöldi, sýni augljóslega að Gísla Marteini sé kennt um ófarir flokksins í borginni, könnunin hafi verið krýning Hönnu Birnu Kristjánsdóttur og pólitískt fall Gísla Marteins.

Iðnaðarráðherra lýkur svo pólitískri aftöku sinni á þessum orðum: „Hinn grátlegi gamanleikur atburðarrásarinnar er sá, að maðurinn sem startaði henni og ætlaði að láta hana lyfta sér til æðstu metorða í borginni - liggur í pólitísku blóði sínu fyrir eigin tilverknað og á sér varla afturkvæmt nema kraftaverk gerist. Hann klúðraði fyrsta sandkassaleiknum sínum."