Bensínlítrinn að líkindum yfir 140 krónur innan skamms

Bensínlítrinn fer að líkindum yfir 140 krónur innan skamms eftir mikla og óvænta hækkun á Rotterdam-markaðnum í gær.

Þá hækkaði bensíntonnið um 17 dollara og fór upp í 893 dollara og díselolíutonnið um 36 dollara og fór upp í 917 dollara, en olíufélögin hér taka mið af markaðnum í Rotterdam.

Bensínverð er nú þegar komið upp í tæpar 139 krónur fyrir lítrann hjá stóru olíufélögunum þremur, eftir 90 aura hækkun í gær, og dísilolíulítrinn er kominn upp í röskar 143 krónur. Þetta er hæsta verð í krónum talið til þessa.

Rúmlega helmingur verðsins rennur í ríkissjóð og eykst greiðsla þangað hlutfallslega við hækkanir olíufélaganna. Félag íslenskra bifreiðaeigenda ítrekaði fyrir helgi þá ósk til stjórnvalda að þau lækki gjaldtöku sína við þessar aðstæður en þau svör hafa borist þaðan að málið sé til athugunar í nefnd embættismanna.

Þá telur FÍB að olíufélögin hafi hækkað álagningu sína umfram verðlagsþróun.