Lögbrotum fækkar milli ára

Lögbrotum sem skráð eru hjá Ríkislögreglustjóra fækkaði nokkuð í janúar miðað við sama mánuð í fyrra. Þetta kemur fram í nýrri afbrotatölfræði ríkislögreglustjóra.

Umferðarlagabrot voru til að mynda rúmlega 3100 í nýliðnum janúar en þau voru rúmlega 3300 í fyrra. Þá voru skráð 140 fíkniefnabrot í ár en þau voru yfir 160 í janúar 2006 og 2007.

Tölur Ríkislögreglustjóra sýna einnig að tilkynningum um líkamsmeiðingar fækkar úr 104 í janúar í fyrra í 85 í ár og þá voru helmingi færri nytjastuldsbrot skráð í fyrsta mánuði þessa árs en á sama tíma í fyrra, eða 30 í stað 59.

Hratt ekið um Hvalfjarðarsveit

Lögreglan hefur á síðustu árum tekið upp staðbundnar hraðamyndavélar, meðal annars færanlega vél á höfuðborgarsvæðinu og vél í Hvalfjarðargöngum sem telur með brotum á höfuðborgarsvæðinu. Þá voru í júlí í fyrra teknar í notkun tvær stafrænar hraðamyndavélar í Hvalfjarðarsveit, sem er í umdæmi lögreglunnar í Borgarnesi, og um miðjan janúarmánuð síðastliðinn voru teknar upp sams konar vélar í Fáskrúðsfjarðargöngum sem er í umdæmi lögreglunnar á Eskifirði.

Athygli vekur að rúmlega 373 hraðakstursbrot voru skráð með staðbundnum hraðamyndavélum á höfuðborgarsvæðinu í janúar síðastliðnum en þau voru 780 í Hvalfjarðarsveit og 79 í Fáskrúðsfjarðargöngum.