Rýrt framlag ríkisstjórnarinnar í kjaramálum

Steingrímur J. Sigfússon, formaður Vinstrihreyfingarinnar - græns framboðs, segir framlag ríkisstjórnarinnar í tengslum við kjarasamninga rýrt og segir að þungi gagnrýninnar muni aukast þegar menn átti sig á því hvað framlag hennar er lítið.

Aðilar vinnumarkaðarins skrifuðu í gærkvöld undir kjarasamninga eftir að framlag ríkisstjórnarinnar til samninganna varð ljóst. Það felur meðal annars í sér hækkun persónuafsláttar um sjö þúsund krónur á næstu þremur árum umfram almenna verðuppfærslu, hækkun á skerðingarmörkum barnabóta og lækkun á tekjuskatti fyrirtækja um þrjú prósent, í 15 prósent.

Áfram greidd óforsvaranlega lág laun

Steingrímur J. Sigfússon segir að Vinstri - græn telji að hugmyndafræðin í kjarasamningunum hafi verið rétt og góð svo langt sem hún nái, það er að hækka laun þeirra sem lægstar tekjur hafa. „Þessi aðgerðir breytir þó ekki hinu að áfram verða greidd óforsvaranlega lág laun sem taka engan veginn mið af framfærslu hér á landi," segir Steingrímur. Um sé að ræða skref í rétta átt.

Steingrímur segir framlag ríkisstjórnarinnar til kjarasamninga rýrt og valda vonbrigðum. Ríkisstjórnarflokkarnir hafi verið búnir að lofa miklu fyrir kosningar, sérstaklega Samfylkingin, um að bæta kjör hinna verst settu en þeir hafi nánast ekkert gert þegar fjárlög voru afgreidd fyrir þetta ár.

Áherslur Sjálfstæðisflokksins hafi ráðið för

„Það er athyglisvert að það virðist meiri vilji til kjarajöfnunar hjá aðilum vinnumarkaðarins heldur en hjá ríkisstjórninni og mér sýnist sem áherslur Sjálfstæðisflokksins hafi algjörlega ráðið för," segir Steingrímur. Þar vísar hann meðal annars til þess að skattar á fyrirtæki hafi verið lækkaðir og ráðist verði í flatar ráðstafanir í skattamálum en hugmyndir um hærri skattleysismörk fyrir þá sem lægst hafa launin slegin út af borðinu. „Ég spái því að þegar menn átta sig á því hversu rýr pakki ríkisstjórnarinnar er þá mun þungi gagnrýninnar aukast," segir Steingrímur.

Þá gagnrýni Steingrímur enn fremur hversu seint aðgerðir ríkisstjórnarinnar komi fram og vísar meðal annars til þess að hækkun persónuafsláttar verði mest árið 2011. „Góðverk ríkisstjórnarinnar láta bíða eftir sér," segir Steingrímur.