Skemmdir á vegum á Suður- og Vesturlandi vegna leysinga

Lögreglan á Hvolsvelli segir mikið verða að gera hjá starfsmönnum Vegagerðarinnar á næstunni við að gera við vegi sem farið hafa illa í miklum leysingum undanfarna daga í umdæmi lögreglunnar.

Í dagbók lögreglunnar að segir að sérstaklega mikar skemmdir hafi orðið á veginum austan við Skóga á Sólheimasandi. Einnig eru holur víðs vegar í malbiki á vegum í umdæminu.

Vegurinn að Sólheimajökli fór í sundur vegna vatnavaxta og varð að loka honum þar til viðgerð hefur farið fram. Björgunarsveitarmenn frá Víkverja í Vík í Mýrdla fóru á staðinn og leiðbeindu fólki að komast þar um á bifreiðum sínum, en það var að koma af jöklinum.

Við þetta má bæta að Vegagerðin biður fólk að sýna varúð vegna skemmda á vegum í Borgarfirði, Norðurárdal og í Hrútafirði. Bæði er um að ræða vatn sem að rennur þvert yfir vegi sem og stórar holur í veginum við Hreðarvatnsskála í Borgarfirði. Þá er ófært á Vestfjarðavegi í Gufufirði og í Kollafirði sökum krapaflóða.