Rödd Evu Maríu bætist í þulaflóru Rásar 1

Sjónvarpskonan ástsæla Eva María Jónsdóttir bætir á næstunni við sig vinnu og byrjar sem þulur á Rás 1.

Eva María segist vera með fiðring í maganum fyrir fyrsta starfsdeginum, enda beri hún óttablandna virðingu fyrir starfinu. „Ég er svona Rúvari, og þykir mjög vænt um fyrirtækið," segir Eva og bætir við að Rás 1 sé óumdeilanlegt hjarta RÚV, og þar sé límið sem heldur öllu saman þulurinn.

Ómþýð röddin ein dugði Evu ekki til að næla sér í starfið. „Ég þurfti að fara í próf til að athuga hvort ég væri hæf í starfið. Það var mjög stressandi," segir Eva, en prófið fólst meðal annars í því að lesa texta með erfiðustu erlendu heitum sem prófdómurum datt í hug.

Þularstarfinu mun Eva sinna samhliða meistaranámi í Íslensku við HÍ, sem hún hefur næsta haust. Hún hættir um leið að vinna hjá sjónvarpinu, en þættir sem hún tekur upp í sumar verða þó í sýningu fram eftir vetri.

„Ég hætti alltaf í skólanum til að fara að vinna, en nú hætti ég í vinnunni til að fara í skóla," segir Eva María, sem útskrifaðist úr bókmenntafræði síðastliðið haust.

Eva segist þó örugglega snúa aftur í sjónvarpið, það sé það sem hún kunni að gera. Öllum sé þó hollt að breyta til, og sjónvarpsstarfið geti verið ansi ávanabindandi. „Það er þessvegna sem ég hætti svona oft, maður verður að slíta sig lausan áður en þetta heltekur mann," segir Eva, en frí hennar frá sjónvarpinu hafa hingað til stafað af öðru en námi. „Ég hef alltaf getað hætt reglulega og farið í fæðingarorlof, en það er ekki á döfinni að fara í fleiri fæðingarorlof í bili," segir Eva, en hún á þrjú börn með manni sínum, Óskari Jónassyni kvikmyndagerðarmanni.