"Ég vona að ég fái hana til baka"

Þrátt fyrir staðhæfingar þess eðlis að Jóhanna Vilhjálmsdóttir sé hætt í Kastljósi hefur Þórhallur Gunnarsson, ritstjóri þáttarins, ekki gefið upp alla von um að fá hana til baka.

"Það stóð til að hún myndi hætta en ég er að vinna í því að finna nýja möguleika þannig að hún geti sameinað vinnuna og fjölskylduna," segir Þórhallur og bendir á að vinna í fjölmiðlum sé ekki alltaf sú fjölskylduvænasta.

Jóhanna sagði sjálf í samtali við Vísi í dag að það væri engin launung að hún vildi eyða meiri tíma með ungum syni sínum.

"Við erum að vinna að lausn þannig að þetta gangi upp og ég vona að ég fái hana til baka. Hún er toppmanneskja," segir Þórhallur.

Aðspurður hvenær málið skýrist endanlega segist Þórhallur búast við því að það komist á hreint fyrir eða um helgina.