Ingibjörg Sólrún á Bridgehátíð

Vísir sagði frá því í að gær að vinirnir Jón Steinar Gunnlaugsson og Davíð Oddsson muni taka þátt í Bridgemóti tengdu Bridgehátið 2008. Ingibjörg Sólrún Gísladóttir mun setja Bridgehátíðina en Gunnar I Birgisson bæjarstjóri og Birkir Jón Jónsson þingmaður munu einnig taka þátt.

Ingibjörg Sólrún Gísladóttir utanríkisráðherra setur Bridgehátíðina 2008, Icelandair Open, á Hótel Loftleiðum klukkan 19 annað kvöld, fimmtudagskvöldið 14. febrúar.

Við sama tækifæri mun Björgólfur Jóhannsson, forstjóri Icelandair Group, opna nýja og glæsilega heimasíðu mótsins. Þúsundir innlendra sem erlendra bridge-áhugamanna munu fylgjast með gangi Bridgehátíðarinnar gegnum heimasíðuna dagana sem mótið fer fram. Slóðin er bridge.is/icelandairopen.

Á annað hundrað pör hafa skráð sig til leiks í tvímenningi sem fer fram á fimmtudag og föstudag. Um helgina fer fram sveitakeppni þar sem tæplega sjötíu lið etja kappi.

Stjörnutvímenningur fer fram á Hótel Loftleiðum í kvöld. Davíð Oddsson, Jón Steinar Gunnlaugsson, Gunnar I. Birgisson og Birkir Jón Jónsson eru meðal keppenda og mæta þeir sterkustu keppendum Bridgehátíðarinnar sem sumir hverjir eru heimsmeistarar í bridge.

Það verða þeir Sverrir Þór Sverrisson og Auðunn Blöndal, Sveppi og Auddi, sem draga saman í lið í kvöld.

Sjá einnig:

Ekki betri en reyndari bridgespilari en Davíð Oddsson