Enn einn Hiltoninn tekinn fyrir ölvunarakstur

Vandræðagangurinn virðist ættgengur hjá Hilton klaninu.

Barron Hilton, 18 ára litli bróðir Parisar, var handtekinn í nótt fyrir ölvunarakstur. Rétt eins og stóra systir nokkrum sinnum áður.

Barron var handtekinn í Malibu klukkan hálf níu að staðartíma eftir heldur einkennilegt aksturslag á bensínstöð sem endaði með því að hann klessti á starfsmann stöðvarinnar. Sem þó varð ekki meint af. Barron reyndist vera með 1,4 prómill áfengis í blóði, sem er ríflega tvöfalt leyfilegt magn í Kaliforníu. Þá var hann einnig með falsað skírteini á sér.

Samkvæmt heimildum TMZ hringdi Barron í Paris úr fangelsinu og bað hana að koma og borga tryggingu svo hann gæti farið heim. Paris, sem hefur töluverða reynslu af fangelsisvist sjálf, sýndi atvikinu þó lítinn skilning, og neitaði að hjálpa honum. Fyrir rest skröpuðu vinir hans aurnum saman og leystu hann út. Hann á yfir höfði sér ökuleyfissviptingu og jafnvel skilorð.