Sigruðu í söngkeppni í New York

Þær Hörn Hrafnsdóttir, mezzósópran og Rannveig Káradóttir, sópran, sigruðu nýlega í alþjóðlegri söngkeppni, sem heitir því virðulega nafni The Barry Alexander International Vocal Competition.

Barry Alexander hefur í mörg ár staðið fyrir alþjóðlegri keppni píanóleikara þar sem megin tilgangur keppninnar er að gefa listamönnum tækifæri til að koma sér á framfæri. Þetta er í fyrsta sinn sem efnt er til samsvarandi keppni í einsöng.

Keppnin fór þannig fram að þátttakendur sendu upptökur með söng sínum og valdi dómnefnd sigurvegara og byggði í vali sínu alfarið á upptökunum. Keppendur komu frá yfir 20 löndum og voru 16 söngvarar valdir úr hópnum sem sigurvegarar og 10 í annað sæti.

Verðlaun sigurvegaranna var svo að koma fram á tónleikum í ekki ómerkara húsi en Carnegie Hall. Þeir sem hlutu annað sætið munu einnig koma fram í New York síðar á árinu.

Auk þessa tveggja sigurvegara komst Margrét Grétarsdóttir, sópran í annað sætið.