Al Kaída áformar hryðjuverk í Þýskalandi

Hryðjuverkasamtökin Al Kaída áforma hryðjuverk í Þýskalandi samkvæmt frétt þýska dagblaðsins Die Welt í dag. Blaðið vitnar í þýska aðstoðarinnanríkisráðherrann August Hanning.

Baráttumenn al Kaída í suðurhluta Afghanistan ráða nú til sín unga múslima frá Þýskalandi í þeim tilgangi að þjálfa þá í hryðjuverkabúðum og senda þá aftur til Þýskalands. Þetta sagði Hanning í viðtali við blaðið, en hann er fyrrum yfirmaður þýsku leyniþjónustunnar samkvæmt heimildum þess.

Um 70 manns sem taldir eru hættulegir í Þýskalandi eru þegar undir stöðugu eftirliti. Þá segir einnig í blaðinu að Lögreglan hafi auk þess áhyggjur af þeim vaxandi fjölda þýskumælandi vídeóskilaboða og leiðbeininga um sprengjusmíð á internetinu.

Blaðið segir að hryðjuverkasamtökin beini sjónum sínum að landinu vegna hernaðarþátttöku Þjóðverja í Afghanistan.

Angela Merkel kanslari Þýskalands neitaði í gær fregnum þess efnis að Bandaríkjamenn ætluðu að senda baráttusveitir til að berjast við uppreisnarmenn Talibana í suðurhluta landsins.