McCain vill stuðning öfga-íhaldsmanna

Bandaríski öldungadeildaþingmaðurinn John McCain reynir nú hvað hann getur til að gulltryggja sér tilnefningu repúblikana sem forsetaefni þeirra með því að höfða til íhaldsmanna.

Þingmaðurinn varð ótvíræður sigurvegari á svokölluðum "super tuesday" en hefur sætt gagnrýni á meðal hægrisinnuðustu repúblikananna fyrir of hófstilltar skoðanir. Hann segist vilja skapa traust á meðal hægrimanna en segist gera sér grein fyrir því að hann verði alltaf gagnrýndur að einhverju leyti af þeirra hálfu.

McCain er nú einungis skrefi frá því að ná útnefningu repúblikana. Aðalráðgjafinn hans, Charlie Black, segir að það sé nánast ómögulegt fyrir Mitt Romney, fyrrverandi ríkisstjóra í Massachusetts og Mike Huckabee, fyrrverandi ríkisstjóra í Arkansas, að saxa á það forskot sem McCain er kominn með. Romney gæti þó ógnað honum.

McCain hefur lengi verið litinn hornauga af mestu íhaldsmönnum úr repúblikanaflokknum og þessa óánægju hefur Romney nýtt sér. McCain hefur meðal annars verið gagnrýndur fyrir léttúð gagnvart ólöglegum innflytjendum og fyrir að kjósa gegn skattalækkunum.