Glanssamkvæmum kringum Óskarinn fækkar

Einu af flottustu samkvæmunum kringum Óskarsverðlaunahátíðina, Vanity Fair partýinu, hefur verið aflýst, til að sýna stuðning við verkfall handritshöfunda.

Tímaritið Vanity Fair gaf frá sér yfirlýsingu þar sem sagði að til að vegna samúðar með handritshöfundum, og öllum öðrum sem verkfallið hefði áhrif á, væri ósmekklegt að halda samkvæmið. Vanity Fair hefur staðið fyrir því frá 1994, og hefur það ávallt dregið að sér allar stærstu stjörnurnar í Hollywood.

Talsmaður blaðsins segir að jafnvel þó verkfallið leysist fyrir verðlaunahátíðina muni áhrifa þess gæta mun lengur. Þar sem hjá Vanity Fair starfi bæði rithöfundar, ljósmyndarar og listamenn, finnist starfsfólkinu því skylt að sína kollegum sínum í Hollywood stuðning.