Áfengismeðferð besta fegrunarráðið?

Amy Winehouse fékk dagsleyfi frá meðferð í dag til að heimsækja eiginmanninn, Blake Fielder-Civil, í fangelsið. Aldrei þessu vant leit söngkonan stórvel út, og brosti meira að segja að ljósmyndurum undan svartri heysátunni.

Samkvæmt heimildum Mail Online hefur eiginmaðurinn stutt dyggilega við bakið á Amy í meðferðinni, og mun samband þeirra þrátt fyrir alla erfiðleikana enn standa á traustum fótum.

Hún þarf þó á meiru en stuðningi eiginmannsins að halda þessa dagana. Sukkið hefur spillt miklu fyrir söngkonunni, sem á nú í vandræðum með að fá vegabréfsáritun til Bandaríkjanna til að komast á Grammy verðlaunahátíðina, auk þess sem lögregla hefur yfirheyrt hana vegna myndbands af henni að reykja krakk.