Ný ofurhraðlest kynnt í Frakklandi

Franski tæknirisinn Alstom kynnti í dag nýja hraðlest sem getur ferðast á allt að 360 kílómetra hraða á klukkustund og á því að verða ein sú hraðskreiðasta í heimi.

Lestin var kynnt að viðstöddum Sarkozy Frakkalandsforseta sem átti þátt í því sem fjármálaráðherra Frakklands árið 2004 að bjarga félaginu með því að einkavæða það að hluta og koma þannig í veg fyrir að þýska félagið Siemens keypti það og leysti upp.

Hin nýja lest, sem fengið hefur styttinguna AVG, er með vélar undir hverjum vagni ólíkt öðrum lestum sem hafa vélar í fremsta og aftasta vagni. Þannig á lestin að geta ferðast eitt þúsund kílómetra á þremur klukkustundum og á getur veitt flugvélum samkeppni í að koma fólki á milli staða að sögn forsvarsmanna Alstom. Ítalska félagið NTV hefur þegar pantað 25 hraðlestar hjá Alstom og er reiknað með að þær verði komnar í gagnið árið 2011.

Þess má geta að forveri AGV-lestarinnar, hin svokallaða TGV-lest sem Alstom hannaði einnig, setti hraðamet í apríl í fyrra þegar hún náði nærri 575 kílómetra hraða. Því er spurning hvort nýtt hraðamet verði sett með AGV-lestinni.