Paul McCartney og Heather Mills brýna sverðin

Bítillinn Paul McCartney og fyrrverandi spúsa hans Heather Mills búa sig nú undir fimm daga réttarhöld til að ákveða endanlega hve mikið hún hún fær úr búinu. Eftir miklu er að sælast, en Paul er talinn rúmlega hundrað milljarða virði.

Mikið ber í milli hjá parinu, sem á hina fjögurra ára Beatrice saman. Paul hefur boðið Heather 15-20 milljónir punda, en hún fer hinsvegar fram á 50 milljónir, eða um sex milljarða íslenskra króna.

Mills mun verja sig sjálf, en að skilnaðarlögfræðingurinn hennar losaði sig við hana í fyrra. Hún mun því yfirheyra eiginmanninn fyrrverandi sjálf.

Heimildamaður bjóst ekki við því að yfirheyrslan yrði á vinalegu nótunum. „Þetta verður hápunktur tveggja ára rifrildis um peninga. Þetta verður ekki fagurt."

Heather er þó ekkert feimin við rifrildi. Lögfræðingurinn fyrrverandi segir hana skulda sér tvær milljónir punda og segist ætla í mál verði þær ekki greiddar. Heather hyggst hinsvegar sjálf fara í mál við lögfræðinginn, þar sem hann hafi gefið henni slæm ráð.