Clinton og Obama hnífjöfn en McCain með þægilegt forskot

Spennan magnast með hverri klukkustundinni en nú er rúmur sólarhringur þangað til hægt verður að segja til með nokkurri vissu hvaða tveir frambjóðendur munu berjast í forsetakosningunum í Bandaríkjunum sem fram fara í nóvember. Á morgun verður kosið í rúmlega tuttugu ríkjum í forvali þar sem fulltrúar demókrata og republikana takast á um hver þeirra hlýtur tilnefningu. Þó getur svo farið að línur verði ekki að fullu ljósar eftir úrslit morgundagsins.

Hjá republikönum hefur John McCain unnið á og þykir líklegri en Mitt Romney til að fara með sigur af hólmi. Hann hefur farið mikinn síðustu daga og safnað um sig stuðningsmönnum, þar á meðal George Pataki, fyrrum öldungardeildarþingmanni í New York og Arnold Schwarzenegger, fylkisstjóra og hasarhetju. Síðustu kannanir benda til þess að stríðshetjan McCain hafi þægilegt forskot á Mitt Romney, helsta keppinautinn.

Spennan er meiri hjá demókrötum en þar á bænum má ekki á milli sjá hvor stendur betur, Hillary Clinton eða Barack Obama. Það eru reyndar ekki góðar fréttir fyrir Clinton sem hafði töluvert forskot á Obama í upphafi en það virðist gufað upp.

Obama hefur líkt og McCain verið duglegur við að ná sér í áhrifamikla stuðningsmenn. Oprah Winfrey styður hann með ráð og dáð eins og frægt er orðið og í dag kynnti kvikmyndastjarnan Robert DeNiro hann til leiks á kosningafundi í Meadowlands leikvanginum í New Jersey. Á fundinn mætti líka Edward Kennedy, öldungadeildarþingmaðurinn. Það væri kannski ekki í frásögur færandi nema fyrir þá staðreynd að Meadowlands er heimavöllur New York Giants, sem sigruðu New England Patriots í Super Bowl í gær.

Kennedy er frá Massachusets á Nýja Englandi og einn harðasti stuðningsmaður Patriots. Obama notaði tækifærið og sagði þetta gott dæmi um hæfni hans til að sameina ólíka hópa undir einum fána. „Að mér skuli hafa tekist að fá Patriots aðdáanda til að mæta hingað daginn eftir Super Bowl er eins og að leiða saman ljónið og lambið," sagði Barack Obama í New Jersey.