Angelina er hrædd um tvíburana

Þó opinberlega hafi ekkert verið gefið út um yfirvofandi fjölgun í barnaskara Brangelinu segja vinir Jolie að ekki einungis sé hún ófrísk, hún glími líka við sérdeilis erfiða meðgöngu.

Life & Style tímaritið hefur það eftir heimildamönnum sínum að tvö, og jafnvel þrjú, börn séu á leiðinni, og parið ætli sér að gera allt sem það getur til að meðgangan gangi vel fyrir sig. Vinur leikkonunnar sagði að hún hefði átt nokkur ógnvekjandi augnablik undanfarnar vikur þegar hún hefði fengið krampa. Hún hefði alltaf hringt beint í lækni, sem hefði gengið úr skugga um að allt væri með felldu.

Það dugar parinu barnelska þó ekki alveg. Þau hafa því brugðið á það ráð að ráða hjúkrunarfræðing til að fylgjast stöðugt með heilsufari Angelinu. Hjúkkan er með sitt eigið herbergi og aðstöðu á heimili þeirra, og mun auk þess fylgja Angelinu í allar ferðir sem eru lengri en 20 kílómetra frá heimilinu.